“Гімназія № 20, гімназія 7 і 30 горада Мінска. У Шчучынскім раёне — Васілішкаўская сярэдняя школа. У Смаргонскім раёне Сыравацкінскі дзіцячы сад — сярэдняя школа — вучэбны комплекс. Гімназія № 4 у Смаргоні і Наваполацкая дзяржаўная гімназія”, — начальнік упраўлення агульнай сярэдняй адукацыі Міністэрства адукацыі Юрый Гладкоў пералічвае Еўрарадыё школы, дзе з верасня будзе праходзіць эксперымент па выкарыстанні партатыўных прыстасаванняў у адукацыйным працэсе. Разам з падручнікамі будуць выкарыстоўваць і нэтбукі.
 
Свае грошы бацькі на гэта выдаткоўваць не будуць.  Каб міністэрства ўбачыла, ці ёсць які вынік, і праводзіцца эксперымент.  Атрымліваецца, у адным класе  адукацыйны працэс будзе ладзіцца традыцыйнымі сродкамі навучання, у іншым з выкарыстаннем нэтбукаў.
 
А ліцэісты БДУ з верасня займеюць электронныя планшэты.

“Спрабуем розныя варыянты партатыўных прыстасаванняў, каб потым зрабіць выбар”, — запэўнівае Юрый Гладкоў.
 
Ліцэйскія планшэты аплаціць БДУ. Аднак у “Парку высокіх тэхналогіяў” сумняюцца ў эфектыўнасці.
 
“У ліцэі не будзе планшэтаў, там будзе звычайны чорна-белы рыдэр украінскай фірмы “Покетбук”. Напрыклад, мы ставім такі планшэт на ўроку біялогіі. Уявіце схему “вянозная і артэрыяльная кроў”. Як вучань на чорна-белым планшэце гэта ўбачыць?!”, — наракае супрацоўнік “Парку высокіх тэхналогіяў”.
 
Як даведалася Еўрарадыё, кошт аднаго школьнага нэтбука будзе вагацца ў раёне 320–350 долараў.
 
“Нэтбукі маюць WI-FI, камеру, прыладу запісу. Дзіцёнак пайшоў з гэтым кампутарам, зрабіў "мувік". Гэта ім самім цікава, цікавей, чым чытаць кнігу ці глядзець малюнкі. Мы ствараем новую прастору для навучання”.
 
Еўрарадыё датэлефанавалася да Васілішкаўскай школы Шчучынскага раёна і даведалася, што інтэрнэт там ёсць.
 
“Нам паказалі эксперыментальны нэтбук — і ўсё на гэтым. Сказалі, да 1 верасня ўсё абсталяванне будзе пастаўленае”, — кажа супрацоўніца Васілішкаўскай школы.
 
У “Парку высокіх тэхналогій” гавораць, што настаўнікаў навучаць працаваць на нэтбуках прадстаўнікі кампаніі “Інтэл” на адмысловых курсах:
 
“З 22 жніўня мы будзем праводзіць адмысловы трэнінг. Прыедуць эксперты з кампаніі “Інтэл”. Мы выклічам настаўнікаў, і іх навучаць, як выкарыстоўваць кампутар на ўсіх прадметах”.
 
Выкладчыкі таксама не спяшаюцца адмаўляцца ад падручнікаў.
 
“Разам з нэтбукамі будзем выкарыстоўваць падручнікі, дзяржаўную праграму: мы ж не можам адступіць ад дзяржаўных нормаў”, — распавядае супрацоўніца Васілішкаўскай школы.
-10%
-30%
-35%
-30%
-40%
-15%
-26%